Wo Bhi Kya Log The Aasan Thi Raahen Jin Ki

Wo Bhi Kya Log The Aasan Thi Raahen Jin Ki
Band Aankhe Kiye Ik Simt Chale Jaate The
Aql-O-Dil Khwaab-O-Haqiqat Ki Na Uljhan Na Khalish
Mukhtalif Jalwe Nigaahon Ko Na Bahlaate The

Ishq Saada Bhi Tha Bekhud Bhi Junun Pesha Bhi
Husn Ko Apni Adaaon Pe Hijaab Aata Tha
Phool Khilte The To Phoolon Main Nasha Hota Tha
Raat Dhalti Thi To Shishon Pe Shabaab Aata Tha

Chandni Kaif Asar Ruh Afza Hoti Thi
Abr Aata Tha To Badmast Bhi Ho Jaate The
Din Main Shorish Bhi Hua Karti Thi Hangame Bhi
Raat Ki God Main Munh Dhaanp Ke So Jaate The

Narm Rau Waqt Ke Dhaare Pe Safine The Ravaan
Saahil-O-Bahr Ke Aain Na Badalte The Kabhi
Nakhudaon Pe Bharosa Tha Muqaddar Pe Yaqin
Chaadar-E-Aab Se Tufaan Na Ubalte The Kabhi

Ham Ke Tufaano Ke Paale Bhi Sataaye Bhi Hain
Barq-O-Baraan Main Wo Hi Shamen Jalaayen Kaise
Ye Jo Aatish Kada Duniya Main Bhadak Uttha Hai
Aansuon Se Use Har Baar Bujhaayen Kaise

Kar Diya Barq-O-Bukharat Ne Mahshar Barpa
Apne Daftar Main Litaafat Ke Siva Kuch Bhi Nahin
Ghir Gaye Waqt Ki Beraham Kashakash Main Magar
Paas Tahzib Ki Daulat Ke Siva Kuch Bhi Nahin

Ye Andhera Ye Talatum Ye Hawaaon Ka Kharosh
Is Main Taaron Ki Subuk Narm Ziya Kya Karti
Talkhi-E-Zist Se Kadva Hua Aashiq Ka Mizaaj
Nigaah-E-Yaar Ki Maasum Ada Kya Karti

Safar Aasan Tha To Manzil Bhi Badi Raushan Thi
Aaj Kis Darja Purasraar Hain Raahen Apni
Kitni Parchhaaiyaan Aati Hain Tajalli Ban Kar
Kitne Jalvon Se Ulajhti Hain Nigaahen Apni