Mera Tamaam Fan Meri Kaawish Mera Riyaaz

Mera Tamaam Fan Meri Kaawish Mera Riyaaz
Ik Na-Tamaam Geet Ke Misre Hain Jin Ke Beech
Maani Ka Rabt Hai Na Kisi Kaafiye Ka Mel
Anjaam Jis Ka Tay Na Hua Ho Ik Aisa Khel
Meri Mataa Bas Yahi Jadu Hai Ishq Ka
Seekha Hai Jis Ko Main Ne Badi Mushkilon Ke Saath
Lekin Ye Saahir-E-Ishq Ka Tohfa Ajeeb Hai
Khulta Nahin Hai Kuch Ke Haqeeqat Main Kya Hai Ye
Taqdeer Ki Ataa Hai Yaa Koi Saza Hai Ye
Kis Se Kahen Ai Jaan Ke Ye Qissaa Ajeeb Hai
Kahne Ko Yun To Ishq Ka Jadu Hai Mere Paas
Par Mere Dil Ke Vaaste Itna Hai Is Ka Bojh
Seene Se Ik Pahaad Sa Hatata Nahin Hai Ye
Lekin Asar Ke Baab Main Halka Hai Is Qadar
Tujh Pe Agar Chalaaun To Chalta Nahin Hai Ye